ත්‍රීකුණාමලයට ඔබ්බෙන් 35 Km පමණ වූ මුහුදු ප්‍රදේශයේදී ධීවර කටයුතුවල නිරතව සිටි ධීවරයෙකුට ඊයේ පෙරවරු කාලයේ මෙම ඩ්‍රෝන යානය හමුව තිබෙනවා. එම ධීවර‍යා විසින් අදාළ ඩ්‍රෝන යානාව ඊයේ සවස ගොඩබිමට ගෙන ඒමට කටයුතු කර තිබුණා. පසුව ආරක්ෂක අංශ ඔහු දැනුවත් කිරීමට කටයුතු කිරීමත් සමඟ ගුවන් හමුදා නිළධාරීන් එම ස්ථානයට පැමිණ විමර්ශනයක් ආරම්භ කළා. අඩි 6ක් පමණ දිග අඩි දෙකක පමණ විශ්කම්භයකින් යුතු මිනිසුන් රහිත මෙම ඩ්‍රෝන යානය විදෙස් රටක නිෂ්පාදිත එකක් බවයි ගුවන් හමුදාව පවසන්නේ. ගුවන් හමුදා මාධ්‍ය ප්‍රකාශක ගෘප් කපිතාන් එරන්ද ගීගනගේ මහතා සඳහන් කළේ මෙම යානය හානිදායක නොවන බවත් පුපුරන ද්‍රව්‍ය කිසිවක් එහි තිබී හමු වී නොමැති බවයි. මෙවැනිම ඩ්‍රෝන යානයක් 2020 වසරේදී ත්‍රීකුණාමලයට ඔබ්බෙන් වූ මුහුදේදි ද හමුව තිබුණා. එය ඉන්දීය ගුවන් හමුදාව විසින් ගුවන් පුහුණු සඳහා යොදා ගැනුණු එකක් බවට පසුව අනාවරණ වුණා. කෙසේ වෙතත් ඊයේ හමුවූ මෙම ඩ්‍රෝන යානය වැඩිදුර විමර්ශන කටයුතු සඳහා ගුවන් හමුදා බාරයට ගෙන තිබෙනවා.